काठमाडौं, माघ ११ । सभामुखमा अग्निप्रसाद सापकोटा निर्विरोध निर्वाचित हुने निश्चित भइसकेपछि अब उपसभामुख कुन दललाई दिने भन्नेबारे नेकपामा छलफल सुरु भएको छ । तर, सभामुखबारे नेकपाका नेताहरुबीच भने मतभेद देखिएको छ ।

प्रधानमन्त्री समेत रहेका अध्यक्ष प्रचण्ड केपी शर्मा ओली राष्ट्रिय जनता पार्टीलाई उपसभामुखमा सघाउने पक्षमा छन् । तर, अर्का अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल नेपाली काँग्रेसलाई उपसभामुख दिने पक्षमा उभिएका छन् ।

प्रधानमन्त्री ओली राजपालाई सरकारमा ल्याउने गरी प्याकेजमा सहमति बनाउने पक्षमा छन् । राजापालाई दुई मन्त्रालय, उपसभामुख, प्रदेश २ सरकारको नेतृत्व दिएर सरकारमा ल्याउन ओलीले रणनीति बनाएका छन् ।

राजपामा सरकारमा जानेबारे मतभेद

प्रधानमन्त्री ओलीले राजपालाई सरकारमा ल्याउन रणनीति बनाउन लागेपनि राजपा भित्रै भने कुरा मिल्न सकेको छैन । राष्ट्रियसभा निर्वाचनमा नेकपा र राजपाबीच गठबन्धन भएपछि प्रधामन्त्री ओलीले राजपालाई सरकारमा ल्याएर पुनः दुई तिहाईको सरकार बनाउने तयारी थालेका हुन् ।

तर, राजपाका केही नेता सरकारमा जाने पक्षमा छन् भने केही नजाने पक्षमा उभिएका छन् । अध्यक्षमण्डलका नेता राजेन्द्र महतो, शरदसिंह भण्डारी, अनिलकुमार झा र राजकिशोर यादव सरकारमा जाने पक्षमा छन् । वर्तमान संयोजक महेन्द्र राय यादव र महन्थ ठाकुर सरकारमा गइहाल्न नहुने पक्षमा छन् ।

प्रधानमन्त्री निकट स्रोतका अनुसार राजपा सरकारमा आउने सम्भावना बढेको छ । त्यसका लागि उनले आन्तरिक तयारी लगभग पूरा गरिसकेका छन् । राजपा सरकारमा आएमा मधेश केन्द्रित दलहरुबीच गठबन्धन तोडिने सम्भावना देखिएको छ ।

माइतीघर मण्डलमा सापकोटाविरुद्ध प्रदर्शन

नेपाल कम्युनिष्ट पार्टी(नेकपा)का नेता अग्नि सापकोटालाई सभामुख नबनाउन माग राख्दै काठमाडौंको माइतीघर मण्डलमा शुक्रबार पनि विरोध प्रदर्शन भएको छ । माइतीघर मण्डलमा विभिन्न क्षेत्रका व्यक्तिहरु, नागरिक समाजका प्रतिनिधिलगायतले प्रदर्शन गरेका हुन् ।

मानव अधिकार र कानूनी शासनको सम्मान गर, पीडितलाई थप अपहेलित र अपमान नगर भन्दै नारा लगाएको थियो । हत्या अभियोगमा मुछिएका नेकपाले रिक्त सभामुखका लागि अग्नि सापकोटालाई उम्मेदवार बनाउने निर्णय गरेपछि उपसभामुख शिवमाया तुम्बाहाङ्फेले सोमबार राजीनामा दिएकी थिइन् ।

सभामुख पदमा सत्तारूढ नेपाल कम्युनिष्ट पार्टी नेकपाका स्थायी कमिटी सदस्य रहेका सापकोटा मात्रै एक्ला उम्मेदवार हुन् । सभामुखका एक्ला उम्मेदवार सापकोटाविरूद्ध सर्वोच्च अदालतमा व्यक्ति हत्या आरोपमा मुद्दा छ । सापकोटालाई तत्काल पक्राउ गर्न माग गर्दै सर्वोच्च अदालतमा रीट परेको छ । वरिष्ठ अधिवक्ता दिनेश त्रिपाठीले शुक्रबार सापकोटाविरुद्ध रीट दायर गर्दै तत्काल पक्राउ गरी उनीमाथि अनुसन्धान थाल्न माग राख्दै रीट दायर गरेका हुन् ।