काठमाडौं, माघ ६। संघीय संसद सचिवालयले प्रतिनिधि सभाको सभामुखको निर्वाचन कार्यतालिका सम्बन्धी सूचना सार्वजनिक गरेको छ ।

सूचनाअनुसार भोलि (मंगलबार) बिहान ११ बजेदेखि २ बजेसम्म सभामुखको उम्मेदवारी दर्ता गर्नुपर्नेछ । मंगलबार दिउँसो २ः३० बजे सभामुखका उम्मेदवारहरुको सूची प्रकाशन गरिने संघीय संसदका महासचिव मनोहरप्रसाद भट्टराईद्वारा हस्ताक्षरित कार्यतालिकामा उल्लेख गरिएको छ ।

संसद सचिवालयले ‘नेपालको संविधानको धारा ९१ एवं प्रतिनिधि सभा नियमावली, २०७५ को नियम ७ बमोजिम’ प्रतिनिधि सभाको सभामुख पदको निर्वाचन कार्यतालिकाबारे सूचना सार्वजनिक गरेको हो ।

कार्यतालिका अनुसार सभामुख चयन गर्नका लागि माघ १२ गते आइतबार दिउँसो ३ बजेदेखि शुरु हुने प्रतिनिधि सभा बैठकमा मतदान हुनेछ ।

सूचनामा भनिएको छ, ‘प्रतिनिधि सभा नियमावली, २०७५ को नियम ७ बमोजिम प्रतिनिधि सभाको बैठकमा सभामुख पदमा निर्वाचित गरियोस् भनी प्रस्तावक सदस्यले प्रस्ताव गर्ने, समर्थक सदस्यले समर्थन गर्ने, उम्मेदवारीको सूचनामाथि सामूहिक रुपमा छलफल हुने र दर्ता क्रमानुसार उम्मेदवारीको प्रस्तावहरुलाई क्रमशः निर्णयार्थ प्रस्तुत गर्ने ।’

यसरी पहिलो प्रस्तावले बहुमत प्राप्त गरेमा अर्को उम्मेदवारी प्रस्तुत गरिने छैन र एक मात्र प्रस्ताव दर्ता भएमा सभामुख निर्विरोध निर्वाचित भएको घोषणा गरिनेछ ।

हेर्नुहोस् निर्वाचन तालिका-