काठमाडौं, कार्तिक २१। पाँचथरको याङ्वरक गाउँपालिक–२, फलैचामा एक व्यक्तिले आफ्नै बुहारीलाई बोक्सि भन्दै फलाम तताएर डाम्न खोजेपछि बुहारी माईतीको शरणमा पुगेकि छिन् ।

हिलिहाङ गाउँपालिका–३, कुर्लुम्बा स्थितको माइत घर भएकी पुजा भारतीले आफूलाई ससुरा कान्तप्रसाद गिरीले बोक्सी भन्दै यातना दिएको वताउनुभएको छ । ससुराले छिमेकी महेन्द्रप्रसाद पौडेलसंग मिलेर निर्घात कुटपिट गर्नुका साथै फलाम तताएर डाम्न खोजेको पिडित पुजाले वताउनुभयो । कुटपिटपछि ससुराले डाम्नलाई फलाम तताउदै गर्दा महेन्द्रले समाइरहेको अवस्थामा आफू फुत्किएर भाग्न सफल भएको पुजाले सुनाउनुभयो ।

पुजा भागेर अहिले माइतीको शरणमा पुग्नु भएको छ । गएको भदौ ३१ गते राती कान्तप्रसाद र महेन्द्रप्रसादले आफूलाई बोक्सी भन्दै निर्धात कुटपिटसमेत गरेको पुजाको भनाई छ । सोही रात आफूमाथी भएको अपराध विरुद्ध नजिकैको प्रहरी चौकीमा ठाडो उजुरी दिएको उहाँको भनाइ छ । यद्यपी प्रहरीले वेवास्ता गरेको पुजाले गुनासो गर्नुभयो ।

प्रहरीले निकै समयपछि जाहेरी विना कारबाही गर्न नमिल्ने भनेपछि गएको असोज २७ मा जाहेरी गरेपनि प्रहरीले पीडकलाई अझै पक्राउ नगरेको पिडित पुजाको दुखेसो छ । घटना घटाएपछि कान्तप्रसाद र महेन्द्रप्रसाद हाल फरार रहेको पाँचथरका प्रहरी निरिक्षक अनिलकुमार पौडेलले वताउनुभयो । कान्तप्रसादले धामीको काम गर्ने गरेका वताइएको छ ।

कान्तप्रसादले मेरो छोरो खान लागिस, घटेर मर्न लाग्यो भन्दै ससुराले यातना दिएको पिडित पुजाको भनाई छ । सासुलेपनि बोक्सै भन्दै मानसिक यातना दिने गरेको उहाँले सुनाउनुभयो । बाबु आमाकै कुरा सुन्ने गरेका श्रीमान तेजप्रसाद गिरीबाट पनि आफू अपहेलित भएको पुजाको भनाई रहेको छ । फरार आरोपितहरुको खोजी भइरहेको प्रहरी निरिक्षक अनिलकुमार पौडेलले जानकारी दिनुभयो ।