निकोसिया। केही दिनअघि साइप्रसमा एक १९ वर्षीय युवतीले १२ जना युवकमाथि सामूहिक बलात्कारको आरोप लगाएकी थियन् । बेलायती युवतीका अनुसार १७ जुलाइका दिन उनलाई १२ जना युवकले बलात्कार गरेका थिए । युवतीको आरोपपछि सबै युवकलाई पक्राउ गरी जेलमा राखेर मुद्दा अगाडि बढाइएको थियो ।

अहिले भने यो मुद्दामा नयाँ जानकारी खुलेको छ । मिडिया रिपोर्टका अनुसार पुलिसले झुटो बयान दिएको आरोपमा ती पीडित भनिएकी युवतीलाई नै पक्राउ गरेको छ । उनलाई आइतबार पक्राउ गरिएको हो । युवतीका अनुसार उनले एक युवकसँग सहमतिमा शारीरिक सम्बन्ध राखेकी थिइन् तर त्यही बेला उनका साथीहरु आए र सबै १२ जनाले बलात्कार गरे ।

युवतीले आधा रातमा आफू ती युवकको कोठामा गएको बताएकी थिइन् जहाँ उनलाई सामूहिक बलात्कार गरिएको थियो । सबै आरोपी युवकहरु इजरायली थिए । पुलिसलेसबैलाई पक्राउ गरेको थियो । तर, बिहीबार ५ आरोपी युवकलाई रिहा गरियो । पछि अन्य ७ जनालाई पनि छोडियो । आरोप लगाउने युवतीलाई नै पक्राउ गरियो । अब ती युवतीलाई अदालतमा पेश गरिनेछ ।

युवतीले आफू एउटा रिसोर्टमा विदा मनाउन आएको बेला एक युवकको सम्पर्कमा आएको बताएकी थियन् । साइप्रसको एइया नापा शहर रिसोर्टका लागि चर्चित छ । सबै आरोपी युवकको उमेर १५ देखि २० वर्ष थियो । पुलिसले यो मुद्दामा डिएनए जाँच गराएको थियो । जेलबाट छुटेपछि सबै युवकहरु खुसी मनाइरहेका देखिए । जानकारी अनुसार यी १२ मध्ये १ युवकले घटनाको बेला आफू गर्लफ्रेण्डसँग भएको प्रमाणित गर्न सफल भएका थिए । यही आधारमा युवतीको बयान झुटो भएको खुलेको थियो ।