वरिष्ठ साहित्यकार मदनमणि दीक्षितको निधन

  • साझा डबली
  • बिहिबार, साउन ३०, २०७६
  • काठमाण्डौँ, साउन ३० । वरिष्ठ साहित्यकार मदनमणि दीक्षितको ९७ वर्षको उमेरमा आज निधन भएको छ । निमोनियाका कारण गत साता ललितपुरको सुमेरु अस्पतालमा भर्ना भएका दिक्षितलाई बुधबार ‘डिस्चार्च’ गरी निवास कालिकास्थान ल्याइएको थियो। निवासमा शौचालय जाँदा बेहोस भएका उनलाई कमलपोखरीस्थित हिमाल अस्पताल लगेपछि चिकित्सकले मृत घोषणा गरेका थिए। उनलाई मुटु, मिर्गौला र श्वासप्रश्वाससम्बन्धी समस्या थियो।

    दीक्षितका ‘माधवी’, ‘ऋग्वेद स् केही प्रमुख सूक्त’, ‘ग्यास च्याम्बरको मृत्यु’ लगायत ४६ कृति छन् । उनले मदन पुरस्कार, साझा पुरस्कार, पद्मश्री पुरस्कारलगायत विभिन्न पुरस्कार र सम्मान पाएका थिए। नेपाली पत्रकारिता क्षेत्रमा पनि उनको विशिष्ट योगदान छ। उनको जन्म १९७९ फागुन ६ गते काठमाडौँको गैरीधारामा भएको थियो।

    उनका श्रीमती, तीन छोरा र एक छोरी छन्।  उनका नाति अवनी दीक्षितका अनुसार दीक्षितको आजै पशुपति आर्यघाटमा अन्त्येष्टि गरिनेछ।
    मदनमणि दीक्षितको जन्म बाबु लक्ष्मणमणि आचार्य दीक्षित र आमा विष्णुकुमारीका सुपुत्रका रूपमा गैरीधारा, काठमाडौंमा वि.सं. १९७९ फागुन ६ गतेका दिन भएको थियो । लामो समय पत्रकारिता गरेका मदनमणि उपन्यास, कथालेखन आदिमा चर्चित रहे । माधवी ग्रन्थका लागि उनलाई २०३९ सालमा मदन पुरस्कार प्रदान गरिएको थियो ।

    दीक्षितका प्रकाशित केही कृतिहरूः

    १. माधवी (उपन्यास, वि.सं. २०३९)
    २. चरैवेति (निबन्ध संग्रह, वि.सं. २०४४)
    ३. त्यो युग (निबन्ध संग्रह, वि.सं. २०४७)
    ४. हाम्रा ती दिन (निबन्ध, वि.सं. २०२९)
    ५. म रुँदै बिर्सन्छु (संस्मरण, वि.सं. २०२७)
    ६. बर्लिन डायरीका पाना (यात्रावर्णन, सन् १९८४)
    ७. लाखौं शिशुहरू लिफ्ट मागिरहेछन्
    ८. मेरी आमाको प्रश्नलाई आज जवाफ चाहिएको छ
    ९. कसले जित्यो कसले हार्‍यो? (कथा संग्रह, वि.सं २०२१)
    १०. दशलाख हिरोसिमातिर
    ११. ग्यास च्याम्बरको मृत्यु (कथा संग्रह, सन् १९८५)

    १२. जीवन महाअभियान

    १३. ऋग्वेद: केही प्रमुख सूक्त (२०६५ वि. सं.)

    प्रतिक्रिया दिनुहोस

    सम्बन्धित समाचार

    © 2024 sajhadabali.com All right reserved Site By : SobizTrend Technology