बेलहिया नाका हुँदै स्थलमार्गबाट नेपाल आउने विदेशी पर्यटकको संख्या बढ्यो

  • साझा डबली
  • शुक्रबार, पुस २०, २०७५
  • रुपन्देही,पुस २० ।  रुपन्देहीको बेलहिया नाका हुँदै स्थलमार्गबाट नेपाल आउने विदेशी पर्यटकको संख्या बढेको देखिएको छ। अघिल्लो वर्ष सन् २०१७ मा भन्दा २०१८ मा यहाँ आउने पर्यटकको संख्या १० प्रतिशतले बढेको हो।

    अध्यागमन कार्यालय भैरहवाका अनुसार वर्ष सन् २०१८ मा एक लाख ६६ हजार २ सय ३५ पर्यटक स्थलमार्गबाट नेपाल आएका छन्। अघिल्लो वर्ष सन् २०१७ मा बेलहियाबाट एक लाख ५० हजार ८ सय ४१ तेस्रो मुलुकका पर्यटक नेपाल भ्रमणमा आएका थिए। यो तथ्यांकमा भारतीय पर्यटकको संख्या समावेश गरिएको छैन। बेलहिया नाकाबाट दैनिक हजारौं भारतीय नागरिक ओहोरदोहोर गर्ने हुँदा पनि भारतीय पर्यटकको तथ्यांक अध्यागमन कार्यालयमा राखिँदैन।

    बेलहिया नाका हुँदै आउने पर्यटकहरूको मुख्य गन्तव्य बुद्ध जन्मस्थल लुम्बिनी हो। कतिपय पर्यटक लुम्बिनी हुँदै पोखरा, चितवन, मनाङ, मुस्ताङ, काठमाडौं, पाल्पा लगायतका जिल्लामा पुग्ने गरेका छन्।

    यस वर्ष सबैभन्दा बढी श्रीलंकाका पर्यटक आएका छन्। बेलहिया नाका हुँदै ५८ हजार ७ सय ६३ जना श्रीलंकनहरू नेपाल आएका छन् भने थाइल्याण्डका ३२ हजार ७ सय ९२, म्यानमारका ३० हजार ५९, भियतनामका ७ हजार २ सय ४१, दक्षिण कोरियाका ६ हजार ८ सय ६६, चीनका ५ हजार २५ जना  बेलहिया नाका हुँदै नेपाल प्रवेश गरेका छन् ।

    यस्तै अन्य देशका पर्यटक बढे पनि स्थलमार्गबाट आउने थाई पर्यटकको संख्यामा भने केही कमी आएको छ । अघिल्लो वर्ष ३३ हजार ६ सय ९३ जना आएकोमा यो वर्ष ३२ हजार ७ सय ९२ मात्रै आएका छन् ।

    स्थल नाकाबाट सबैभन्दा बढी २०१८ मार्चमा २८ हजार ८ सय ४८ पर्यटक आएका थिए । त्यस्तै नोभेम्बरमा २५ हजार ४२, फेब्रुअरीमा २१ हजार ३ सय ७२, अगस्टमा १८ हजार २ सय ३३, अक्टोबरमा १७ हजार १ सय ९३ थिए । अफ सिजनको रूपमा रहेको जुनमा १३ सय ८८ पर्यटक मात्र यो नाकाबाट नेपाल आएका थिए।

    हरेक वर्ष लुम्बिनी आउने बाह्य तथा आन्तरिक पर्यटकहरूको संख्या बढे पनि यस क्षेत्रका पर्यटन व्यवसायीहरूले भने त्यसको लाभ लिन नसकेको गुनासो आउने गरेको छ।

    प्रतिक्रिया दिनुहोस

    सम्बन्धित समाचार

    ताजा अपडेट

    © 2024 sajhadabali.com All right reserved Site By : SobizTrend Technology